मुस्ताङ, अन्नपूर्ण संरक्षण क्षेत्र आयोजना (एक्याप)को तथ्यांक अनुसार सन् २०२४ को जनवरीदेखि अक्टोबर ८ तारिखसम्ममा १ लाख ५ हजार ६९८ विदेशी पर्यटकले हिमाली जिल्ला मुस्ताङको भ्रमण गरेका छन्। तीमध्ये ९० हजार ८१ जना सार्क राष्ट्रका पर्यटक छन् भने १५ हजार ६१७ जना अन्य मुलुकका विदेशी पर्यटक रहेका छन्।

**सार्क राष्ट्रका पर्यटकको उच्च सहभागिता**

एक्याप जोमसोमका कार्यालय प्रमुख प्रमोदराज रेग्मीका अनुसार यो अवधिमा मुस्ताङ भित्रिएका ८२.६६ प्रतिशत पर्यटक सार्क राष्ट्रका छन्, जसमा भारतीय तीर्थालुहरूको संख्यात्मक योगदान प्रमुख छ। मुक्तिनाथ मन्दिरमा दर्शन गर्न भारतीय तीर्थालुहरूको विशेष रुचि रहेको कारणले मुस्ताङमा भारतीय पर्यटकको आगमन बढी रहेको बताइएको छ।

**बाढी-पहिरोले पर्यटक आगमनमा कमी**

रेग्मीले अविरल वर्षाका कारण देशका विभिन्न स्थानमा बाढी, पहिरो, र सडक अवरुद्ध भएकोले पर्यटक आगमनमा कमी आएको बताए। विशेषगरी सेप्टेम्बरको अन्तिम र अक्टोबरको पहिलो हप्ता कम पर्यटकले मुस्ताङ भ्रमण गरेको एक्यापको विवरणमा देखिएको छ। अक्टोबर ८ सम्म जम्मा २ हजार ८९६ जना विदेशी पर्यटकले मुस्ताङ भ्रमण गरेका थिए।

**राउण्ड अन्नपूर्ण पदमार्गमा ८ हजार बढी पर्यटक**

मुस्ताङ भित्रिने कुल पर्यटकमध्ये ८ हजार ३९७ जनाले लमजुङको बेसीसहर हुँदै मनाङबाट मुस्ताङको राउण्ड अन्नपूर्ण चक्रिय पदमार्ग यात्रा गरेका थिए। यीमध्ये ९७.०७ प्रतिशत पर्यटक अन्य मुलुकका थिए भने २.९२ प्रतिशत मात्र सार्क राष्ट्रका पर्यटक रहेको तथ्यांकले देखाएको छ।

**सबैभन्दा बढी पर्यटक मे महिनामा**

सन् २०२४ मा सबैभन्दा बढी मे महिनामा २९ हजार ७६२ जना पर्यटकले मुस्ताङ भ्रमण गरेका थिए भने सबैभन्दा कम जनवरी महिनामा २ हजार १२६ जना मात्र आगन्तुक आएका थिए।

पछिल्लो वर्षको तथ्यांक सन् २०२३ मा १ लाख २१ हजार ३५२ जना विदेशी पर्यटकले मुस्ताङको भ्रमण गरेका थिए।