आश्विन शुक्लपक्ष त्रयोदशीका दिन आज पनि मान्यजनबाट आशीर्वादस्वरुप नवदुर्गाको प्रसादका रुपमा टीका र जमरा लगाउने क्रम निरन्तर चलिरहेको छ। आश्विन शुक्ल प्रतिपदादेखि नवमीसम्म नवदुर्गाको साधना गरिएको प्रसाद विजयादशमीका दिनदेखि सुरु भएको हो, र यो क्रम आश्विन शुक्ल पूर्णिमासम्म जारी रहनेछ। टाढा रहेका आफन्त र परिवारजनले यस अवधिमा घर घरमा गएर आशीर्वाद थाप्ने परम्परा निभाइरहेका छन्।

यसै क्रममा, राजधानीमा विजयादशमीपछि पुनः चहलपहल बढेको छ। निधारमा रातो टीका र जमरा लगाएका मानिसहरू मान्यजनकहाँ आशीर्वाद थाप्न हिँडिरहेका दृश्यहरु देख्न सकिन्छ। बडादसैँको सार्वजनिक बिदा सकिएपछि सरकारी कार्यालयहरु आजदेखि खुला भए पनि टीका र आशीर्वाद थाप्ने कार्यक्रम कोजाग्रत पूर्णिमासम्म निरन्तर चलिरहनेछ।

यस वर्ष असोज ३० गते बुधबार अखिल बलिपूर्ति र कात्तिक १ गते बिहीबार कोजाग्रत पूर्णिमा परेको छ, जसअनुसार नेपालीको महान् चाड बडादसैँको समापन हुनेछ। पूर्णिमाको दिन महालक्ष्मीको पूजा आराधना गर्ने परम्परा रहेको छ, जसलाई रातभर जाग्राम बसेर मनाइन्छ।