नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आधुनिक चीनको विकासबाट नेपालले धेरै सिक्न चाहेको बताएका छन्। खुमलटारस्थित निवासमा चिनियाँ कम्युनिष्ट पार्टीको प्रतिनिधिमण्डलसँगको भेटमा प्रचण्डले चीनको विकास नेपालका लागि ठूलो सिकाई भएको बताए। उनले चीन सरकार, चिनियाँ कम्युनिष्ट पार्टी, र महासचिव सी जिङपिङलाई नेपालको विकासमा देखाएको तत्परताका लागि धन्यवाद व्यक्त गरे।

प्रचण्डले आफ्नो सन् २०१९ को चीन भ्रमणलाई ऐतिहासिक बताउँदै उच्चस्तरीय भ्रमणमा भएका समझदारीहरू कार्यान्वयन गर्नुपर्नेमा जोड दिए। उनले नेपाल–चीन सम्बन्धलाई पूर्वाधार, शिक्षा, स्वास्थ्य लगायतका क्षेत्रमा विज्ञान प्रविधिको प्रयोगबाट सुदृढ बनाउन आवश्यक रहेको औंल्याए।

चिनियाँ प्रतिनिधिमण्डलका प्रमुख, छिङहाई प्रान्तका सेक्रेटरी छेन् गाङ्गले नेपाल–चीन मित्रता अझ प्रगाढ बनाउनुपर्ने र चीनले सहअस्तित्वमा आधारित सम्बन्धलाई महत्व दिएको बताए।

भेटमा माओवादी केन्द्रका वरिष्ठ नेताहरू नारायणकाजी श्रेष्ठ, पम्फा भुसाल, जनार्दन शर्मा, शक्तिबहादुर बस्नेतलगायत सहभागी थिए।