अख्तियार दुरुपयोग अनुसन्धान आयोगले सिंहदरबारभित्र सेयर किनेबेचमा रोक लगाउने तयारी गरेको छ। सरकारी कर्मचारीहरूले कार्यालय समयमा सेयर कारोबारमा संलग्न भएको गुनासो बढेपछि, कार्यालयभित्र प्रयोग हुने ट्रेड म्यानेजमेन्ट सिस्टम (टीएमएस) बन्द गराउने योजना अख्तियारले अघि बढाएको हो।

कार्यालय समयमा सरकारी कर्मचारीहरूले सेयर कारोबार गरेको उजुरी अख्तियारमा परेपछि, प्रधानमन्त्री तथा मन्त्रिपरिषदको कार्यालयमार्फत टीएमएस बन्द गराउने प्रक्रिया अघि बढाइएको अख्तियार स्रोतले जानकारी दिएको छ। यस सम्बन्धमा भोलि पत्राचार गर्ने तयारी भएको छ।

उजुरीमा उल्लेख भएअनुसार, सिंहदरबारभित्रका कर्मचारीहरू कार्यालयको नियमित काम छाडेर सेयर किनेबेचमा व्यस्त हुने गरेका छन्। यसले सरकारी कामको प्रभावकारितामा गम्भीर असर पारेको छ। कर्मचारीहरू टीएमएसमा व्यस्त हुँदा, आवश्यक फाइल टिप्पणी नगर्ने, माग गरिएको राय सुझाव समयमा नदिने लगायतका समस्याहरू बढ्दै गएको उजुरीमा उल्लेख छ।

सेयर बजारमा उछाल आउँदा कर्मचारीहरू अत्यधिक उत्साही भएर काम गर्न छाड्ने र बजार ओरालो लाग्दा उनीहरू काममा उदासीन हुने प्रवृत्ति मौलाएको स्रोतले जनाएको छ। यसै कारण, सिंहदरबारभित्र सेयर कारोबारलाई निरुत्साहित गर्न अख्तियारले यो कदम चाल्न लागेको हो।

सरकारी कामको प्रभावकारिता बचाउन र कर्मचारीलाई जिम्मेवार बनाउन अख्तियारले यो कदम उठाएको बताइएको छ।