काठमाडौं, असोज २६ – नेपाली कांग्रेसका महामन्त्री गगन थापाले देशमा दीर्घकालीन स्थिरता र राजनीतिक सुधारका लागि अब पुराना नेताहरूलाई विश्राम दिई नयाँ पुस्तालाई अवसर दिनुपर्ने बताएका छन्।

उनले नेपाली कांग्रेसका सभापति शेरबहादुर देउवा, एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ लाई संकेत गर्दै भने,

               “अब तीन दलका तीन नेताहरूलाई बिदा गरौं र नयाँ पुस्तालाई अवसर दिऔं।”

थापाको भनाइमा, पछिल्ला १० वर्षदेखि यी तीन नेताबीच “म्युजिकल चेयर” जस्तै सत्ताको खेल चल्दै आएको छ, जसले मुलुकलाई अस्थिरता र निराशाको चक्रमा बाँधे। उनले यही निरन्तर नेतृत्वकै कारण अहिलेको राजनीतिक अविश्वास र सुस्त शासन व्यवस्था उत्पन्न भएको दाबी गरे।

थापाले भने,

“गत भदौ २३ र २४ अघिको नेपाल र त्यसपछिको नेपाल फरक छ। अब देश नयाँ दिशातर्फ अघि बढ्न चाहन्छ, त्यसका लागि सोच र शैली बदल्न आवश्यक छ।”

उनका अनुसार, पुरानो पुस्ताले आफ्नो योगदान पूरा गरिसकेको र अब युवापुस्ता अघि सर्नु समयको माग बनेको छ। उनले दलभित्र र बाहिर दुबै ठाउँमा नयाँ सोच, नीतिगत स्थिरता र पारदर्शी नेतृत्व आवश्यक रहेको उल्लेख गरे।

थापाको यो अभिव्यक्ति पार्टीभित्रको नयाँ पुस्ता र पुरानो पुस्ताबीचको सत्ता–संघर्षसँग पनि जोडिएको मानिएको छ। विश्लेषकहरूका अनुसार उनको वक्तव्यले आगामी राजनीतिक पुनर्संरचनाको संकेत पनि गर्न सक्छ।