स्याङ्जा, कात्तिक ९ —
सूचना  तथा  प्रविधि  (आईसीटी)  कार्यक्रमका  लागि  विद्यालयमा आएको बजेट हिनामिना गरेको आरोपमा स्याङ्जाको शिशु कल्याण माध्यमिक विद्यालयका तत्कालीन प्रधानाध्यापकसहित तीन जनाविरुद्ध भ्रष्टाचार मुद्दा दायर गरिएको छ।अख्तियार दुरुपयोग अनुसन्धान आयोगले विद्यालयका तत्कालीन प्रधानाध्यापक रविलाल लुइँटेल, तत्कालीन लेखापाल छविलाल गाहा र विद्यालय व्यवस्थापन समितिका तत्कालीन अध्यक्ष राम थापाविरुद्ध आइतबार विशेष अदालतमा मुद्दा दायर गरेको हो।

अख्तियारका अनुसार आर्थिक वर्ष २०७८/०७९ मा स्याङ्जाको गल्याङ नगरपालिका–४ स्थित शिशु कल्याण माविमा सूचना प्रविधि कार्यक्रमका लागि आएको बजेट तिनै व्यक्तिहरूले आपसी मिलोमतोमा दुरुपयोग गरेको प्रमाण फेला परेको छ।उनीहरूले २०७९ असार २३ गतेको मितिमा विद्यालयका नाममा ७ थान डेस्कटप कम्प्युटर, १ थान प्रोजेक्टर, १ थान ल्यापटप र १ थान प्रिन्टर खरिद गरेको देखाए पनि, खरिद प्रक्रियामा अनियमितता देखिएको अख्तियारको ठहर छ।

खरिदको हिसाबले कूल ६ लाख ७४ हजार ४५ रुपैयाँ खर्च भएको देखाइएको थियो। तर, वस्तु खरिद र भुक्तानी विवरणमा ठुलो अन्तर भेटिएपछि आयोगले अनुसन्धान गरी उनीहरूविरुद्ध भ्रष्टाचारको मुद्दा दायर गरेको जनाएको छ।अख्तियारले हालसालै विद्यालयमा सूचना प्रविधि कार्यक्रमका नाममा हुने बजेट दुरुपयोगबारे पनि चासो बढाएको र अन्य विद्यालयहरूको पनि नजिरका रूपमा यस मामिलाको विस्तृत अध्ययन भइरहेको जनाएको छ।