काठमाडौँ । बूढानीलकण्ठ मन्दिर परिसरमा आगामी २०८२ साल कार्तिक ११ गते मंगलबार बिहान ८ बजे सामूहिक सफाइ कार्यक्रम हुने भएको छ। उक्त कार्यक्रम कम्युनिटी केयर नेपालले आयोजना गर्न लागेको हो।

संस्थाले मन्दिर परिसरलाई स्वच्छ, आकर्षक र भक्तजनमैत्री बनाउनका लागि सरसफाइ अभियान सञ्चालन गर्न लागेको बताएको छ। यस अवसरमा स्थानीय बासिन्दा, भक्तजन, विद्यार्थी तथा स्वयंसेवकलाई श्रमदानमार्फत सहभागी हुन हार्दिक अनुरोध गरिएको छ।

आयोजकले भनेको छ, “बूढानीलकण्ठ मन्दिर हाम्रो आस्था र गौरवको प्रतीक हो। यसलाई सफा र सुव्यवस्थित राख्नु सबैको दायित्व हो। त्यसैले सबैले आफ्नो समय र श्रमले योगदान दिनुहोस्।”

उक्त दिन हरिबोधनी एकादशी तथा सप्ताह महाभजन यज्ञ पनि आयोजना हुने भएकाले श्रद्धालु भक्तजनको उल्लेखनीय उपस्थिति रहने अपेक्षा गरिएको छ। कार्यक्रमको तयारी अन्तिम चरणमा पुगेको आयोजकले जनाएको छ।