काठमाडौं । नेपाली कम्युनिस्ट आन्दोलन पुनः एकताका दिशामा अघि बढ्दै गएको छ । नेकपा (एमाले) का पूर्व उपाध्यक्ष भीम रावल नेतृत्वको ‘मातृभूमि जागरण अभियान, नेपाल’ आज औपचारिक रूपमा नेपाली कम्युनिस्ट पार्टीमा समाहित हुने भएको छ ।

गत आइतबार पुष्पकमल दाहाल ‘प्रचण्ड’ र माधवकुमार नेपालसहितका शीर्ष नेताहरूसँगको निर्णायक संवादपछि रावल नेतृत्वको अभियान नवगठित नेपाली कम्युनिस्ट पार्टीमा समाहित हुने सहमति बनेको हो ।

यसै सन्दर्भमा आज दिउँसो काठमाडौंमा ‘बृहत् पार्टी समायोजन कार्यक्रम’ आयोजना गरिएको पार्टीका नेता प्रकाश ज्वालाले जानकारी दिएका छन् । उनका अनुसार, यस कार्यक्रममार्फत देशभरका वामपन्थी शक्तिलाई एकताबद्ध गर्दै कम्युनिस्ट आन्दोलनलाई अझ सबल र संगठित रूप दिने लक्ष्य राखिएको छ ।

नेता ज्वालाले भने, “रावलज्यूको नेतृत्वमा रहेको अभियानको प्रवेशले नेपाली कम्युनिस्ट पार्टीको संगठनात्मक शक्ति र वैचारिक आधार दुवै मजबुत बन्नेछ । अब हामी सबै वामपन्थीहरू एक साझा उद्देश्य—सशक्त, समृद्ध र स्वाभिमानी नेपालका लागि अघि बढ्नेछौं।” र समाजवाद तर्फ देश अगाडि बढछ ।

यस घटनाले नेपाली वाम राजनीतिमा नयाँ ऊर्जा थप्ने र देशभर वाम एकतालाई बलियो सन्देश दिने विश्वास व्यक्त गरिएको छ ।