बुढानिलकण्ठ नगरपालिका वडा नम्बर १३ स्थित लोहिटि रिसोर्टमा श्री भद्रकाली बहुउद्देश्य सहकारी संस्थाको १७ औं वार्षिक साधारण सभा सफलतापूर्वक सम्पन्न भएको छ। सभाको प्रमुख अतिथि वडा अध्यक्ष टिकानारायण श्रेष्ठ रहनुभएको थियो भने विशेष अतिथिमा राष्ट्रिय सहकारी बैंक, चक्रपथ शाखाका प्रतिनिधि र बुढानिलकण्ठ नगरपालिका कार्यपालिका सदस्य प्रमुख रीना श्रेष्ठले आफ्नो उपस्थिति जनाउनुभएको थियो। कार्यक्रममा विभिन्न सहकारी र सामाजिक संस्थाका प्रतिनिधिहरू समेत सहभागी थिए।

साधारण सभामा सहकारीको मुल्य, मान्यता र सिद्धान्त अनुरूप सदस्यहरूलाई रोजगारी र आयमूलक कार्यमा लाग्न प्रेरित गर्दै सहकारीले सरल ढङ्गबाट ऋण उपलब्ध गराउने प्रतिबद्धता व्यक्त गरियो। “आजको बचत, भोलिको लगानी” भन्ने सोचका साथ सहकारीले आर्थिक सहयोग र अभिवृद्धिमा योगदान पुर्याउने लक्ष्य राखेको छ।यस आर्थिक वर्षमा सहकारीले बचतधारिणी कार्यक्रमतर्फ उल्लेखनीय वृद्धि गरेको कुरा सभामा जानकारी गराइयो। आगामी दिनमा उत्पादन क्षेत्रमा ध्यान दिँदै आवश्यक योजनाहरू तयार पारेर सहकारीलाई थप सशक्त बनाउने योजना रहेको छ। सहकारीले खुल्ला सदस्यता प्रणालीलाई प्राथमिकता दिँदै आधिकारिक व्यक्तिहरूलाई आबद्ध गराउने लक्ष्यसहित लघु र मध्यम उद्यमीहरूलाई कर्जा सेवा पुर्याउने योजना अघि सारेको छ।

आर्थिक वर्ष २०८०/८१ को प्रतिवेदन सञ्चालक समिति कोषाध्यक्ष विनय श्रेष्ठले प्रस्तुत गरेको थियो जुन प्रतिवेदनमा संस्थाको कुल सम्पत्तिमा उल्लेख्य वृद्धि भएको देखाएको छ। प्रतिवेदन अनुसार, गत आर्थिक वर्षमा संस्थाको कुल सम्पत्ति ३ करोड १२ लाख ५४ हजार थियो भने यस आर्थिक वर्षमा ५ करोड १० लाख ४४ हजार १०० पुगेको छ, जसले ६३.३२ प्रतिशतले वृद्धि भएको देखाउँछ।त्यसैगरी, संस्थाले निक्षेप सङ्कलनमा पनि महत्वपूर्ण सुधार गरेको छ। गत वर्षको निक्षेप २ करोड १५ लाख २७ हजार रहेकोमा यस आर्थिक वर्षमा ७६.५७ प्रतिशतले वृद्धि भएको छ। कर्जा लगानीको सन्दर्भमा पनि वृद्धि देखिएको छ, जसअनुसार, गत वर्षको कर्जा लगानी २ करोड ६१ लाख २० हजार ५०० थियो भने यस आर्थिक वर्षमा ६२.९५ प्रतिशतले वृद्धि भएको छ।सेयर चुक्तापुँजीमा पनि सुधार देखिएको छ, जहाँ ७७ लाख ५८ हजार ७०० को चुक्तापुँजी यस आर्थिक वर्षमा ४६.५१ प्रतिशतले वृद्धि भएको छ। ब्याज आम्दानीमा भने अत्यधिक वृद्धि देखापरेको छ, जसमा २५ लाख ५८ हजार ४५९ को आम्दानी ११०.१० प्रतिशतले वृद्धि भएको छ। सञ्चालन आम्दानीमा पनि वृद्धि भएको छ, जसमा ४५६ हजार ७०० बाट ७३.३३ प्रतिशतले वृद्धि भएको देखिन्छ। ब्याज आम्दानी र कर्मचारी खर्च दुबैमा ११०.१० प्रतिशतले वृद्धि भएको देखिएको छ भने कर्मचारी खर्चमा ९२.४ प्रतिशतको वृद्धि भएको छ। प्रशासनिक खर्चमा पनि उल्लेखनीय वृद्धि देखिएको छ, जसमा ३ लाख ७८ हजार ३०० बाट ९९.६५ प्रतिशतले वृद्धि भएको छ। अन्त्यमा, कर्जा नोक्सानी व्यवस्थामा पनि ६२.९५ प्रतिशतले वृद्धि भएको प्रतिवेदनले देखाएको छ।

संस्थाले आफ्नो आगामी योजनामा नयाँ सम्भावित लगानी क्षेत्रहरूको पहिचान गरी सदस्यहरूको हितमा विविधिकरण गर्दै अगाडि बढ्ने योजना बनाएको छ। संस्थाले सहकारी क्षेत्रले अवलम्बन गरेका नीतिहरूलाई आत्मसात गर्दै लगानी वृद्धि गर्ने सोच राखेको छ, विशेष गरी साना व्यवसायी तथा उद्यमीलाई प्राथमिकतामा राख्दै। अर्गानिक कृषि कार्यक्रमलाई पारदर्शी र व्यवस्थित बनाउने र सामाजिक उत्तरदायित्व अन्तर्गत रोजगारी सिर्जनामा जोड दिने योजना पनि उल्लेख गरिएको छ। बीमा एजेन्ट कार्यक्रम सञ्चालन गरी प्रवृत्तिमैत्री संयन्त्रणको विस्तार गर्दै गुणस्तरीय सेवा प्रदान गर्ने लक्ष्य समेत संस्थाको प्राथमिकतामा परेको छ।

सहकारी संस्थाको लेखा समितिको संयोजक सुरेन्द्र श्रेष्ठले आर्थिक वर्ष २०८०/८१ को प्रतिवेदन प्रस्तुत गर्दै अघिल्लो साधारण सभामा पारित निर्णयहरूको कार्यान्वयन अवस्थाबारे जानकारी गराएका थिए। उनले प्रतिवेदनमा यो आर्थिक वर्षमा बसेका विभिन्न बैठकहरूको संख्या र ती बैठकहरूबाट पारित निर्णयहरूको कार्यान्वयन प्रक्रिया पनि प्रस्तुत गरेका थिए। यसैगरी, ऋण लगानी प्रक्रिया, धितो तथा सुरक्षण सम्बन्धी व्यवस्थाहरूको विस्तृत विवरण प्रतिवेदनमा समेटिएको थियो। सहकारी विभागले जारी गरेको मापदण्डहरूको पालना सम्बन्धी अवस्था पनि प्रतिवेदनमा उल्लेख गरिएको थियो। पदाधिकारीको पारिश्रमिक, भत्ता र अन्य सुविधाहरू सम्बन्धी व्यवस्थाहरूको जानकारी पनि प्रतिवेदनमा प्रस्तुत गरिएको थियो। साथै, कर्मचारी प्रशासनसँग सम्बन्धित व्यवस्थाहरू पनि विस्तृत रूपमा समावेश गरिएको थियो। लेखा समितिले यसअघि दिएको सुझावको आधारमा सञ्चालक समितिले गरेका कार्यान्वयनको अवस्थाबारे पनि प्रतिवेदनमा चर्चा गरिएको थियो। अन्त्यमा, लेखा समितिले आगामी सुधारका लागि केही थप सुझावहरू पनि दिएको थियो।

संस्थाले कर्जा नोक्सानी व्यवस्था अन्तर्गत असल कर्जा,शंकास्पद कर्जा र खराब कर्जामा कर्जा नोक्सानी व्यवस्था सिद्धान्त अनुसार १ प्रतिशत ३५ प्रतिशत र १०० प्रतिशतका दरले कर्जा नोक्सानी ब्यवस्था गरिएको समेत प्रतिवेदनमा उल्लेख्य गरिएको छ।

संस्थाको सञ्चालक समितिले आगामी आर्थिक वर्ष ८१/८२ का लागि वित्तीय प्रवर्द्धन योजना सार्वजनिक गरेको छ। संस्थाको नेतृत्वमा सुजन श्रेष्ठ अध्यक्षका रूपमा रहेका छन् भने विनय श्रेष्ठ कोषाध्यक्षको जिम्मेवारीमा छन्। सदस्यहरूमा गणेशबहादुर श्रेष्ठ र राहुल श्रेष्ठले आफ्नो भूमिका निर्वाह गर्दैछन्। लेखा समिति संयोजकको जिम्मेवारी सुरेन्द्र श्रेष्ठले पाएका छन् भने ऋण उपसमिति सदस्यहरूमा महेश श्रेष्ठ र प्रविण श्रेष्ठ रहेका छन्। यसैगरी, शिक्षा उपसमिति अन्तर्गत विनिता श्रेष्ठ र राजेन्द्र श्रेष्ठले काम गरिरहेका छन्। व्यवस्थापकका रूपमा रामकृष्ण श्रेष्ठले ५ जना कर्मचारीहरूको समन्वयमा संस्थालाई सञ्चालन गरिरहेका छन्।

संस्थाको अध्यक्ष सुजन श्रेष्ठका अनुसार संस्थाले आगामी वर्षमा आफ्नो सेयर पूँजी वृद्धि गर्ने, कर्जा लगानीलाई विस्तार गर्ने र अन्य विभिन्न कोषहरूको व्यवस्थापनलाई सुधार गर्ने योजना बनाएको छ। विशेषगरी, जगेडा कोष लगायतका कोषहरूको व्यवस्थापनलाई बलियो बनाउने र सम्पत्तिलाई थप विस्तार गर्ने संस्थाको प्राथमिकता रहेको छ। साथै, संस्थाले चालु दायित्वलाई घटाउने योजना समेत अघि सारेको छ। यस रणनीतिको मुख्य उद्देश्य वित्तीय स्थायित्वलाई सुनिश्चित गर्दै संस्थाको समग्र सम्पत्ति वृद्धि गर्नु रहेको छ।