काठमाडौँको पशुपति क्षेत्रको ९ रोपनी ९ आना जग्गामा रहेको गौशालाको वार्षिक भाडा जम्मा ५१ हजार मात्र रहेको विषयले विवाद उत्पन्न गरेको छ। संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले पशुपति क्षेत्र विकास कोषलाई गौशाला धर्मशाला खाली गराउने काम रोक्न निर्देशन दिएका छन्। पशुपति क्षेत्र विकास कोषका अध्यक्षसमेत रहेका मन्त्री पाण्डेले असोज ३० गते ‘शान्ति सुरक्षामा समस्या उत्पन्न भएको’ भन्दै कोषलाई गरेको पत्राचारमा गौशाला धर्मशाला खाली गराउने काम रोक्न निर्देशन दिएको उल्लेख छ।

पशुपति गौशाला धर्मशाला राज्यको सम्पत्ति भएकाले कानुनअनुसार नै फिर्ता ल्याउनुपर्ने कोषको धारणा छ। कोषले यो सम्पत्ति कुनै व्यक्ति वा समूहलाई सुम्पिन नमिल्ने र काठमाडौँ महानगरपालिकासँग सहकार्य गरेर गैरनाफामूलक रूपमा सञ्चालन गर्न योजना बनाएको जनाएको छ।

यो विवादको मुख्य विषय मारवाडी सेवा समितिले २०६० सालमा सम्झौता गरेर उक्त सम्पत्तिलाई व्यापारिक प्रयोजनका लागि प्रयोग गर्दै आएको हो।