नेपाल प्रहरीले ढलौटका मूर्ति चोरी गर्ने दुईजना पक्राउ गरेको छ। महानगरीय प्रहरी वृत्त स्वयम्भूको टोलीले ढलौट चोरेर ठमेलबाट डल्लुतर्फ जाँदै गरेको अवस्थामा सिन्धुपाल्चोक जुगल गाउँपालिका–५ का १८ वर्षीय सुदीप नेपाली र रसुवा गोसाइँकुण्ड गाउँपालिका–५ का १८ वर्षीय रमेश बागदासलाई आज पक्राउ गरेको हो।

महानगरीय प्रहरी परिसर काठमाडौँका प्रवक्ता प्रहरी उपरीक्षक दिनेशराज मैनालीले ४ थान ढलौटको मूर्तिसहित नेपाली र बागदासलाई पक्राउ गरिएको जानकारी दिए। पक्राउ परेकासँग प्रहरीले २ किलो १ सय ग्रामको गणेशको मूर्ति, १ किलो ३ सय ग्रामको गणेशको मूर्ति, १ किलो २ सय ग्रामको गणेशको मूर्ति र १ किलो ५ सय ग्रामको बुद्धको मूर्ति बरामद गरेको छ।

उनीहरूले ज्याकेटभित्र मूर्ति लुकाएर ल्याएको वेला प्रहरीले पक्राउ गरेको हो। पक्राउ परेका उनीहरूलाई मुलुकी अपराधसंहिता २०७४ को परिच्छेद–२० अन्तर्गत दफा २४१ को ‘चोरी गर्न नहुने कसूर’ मुद्दामा काठमाडौँ जिल्ला अदालतबाट ५ दिनको म्याद थपेर अनुसन्धान भइरहेको प्रवक्ता मैनालीले बताए।