काठमाडौ / सरकारले पूर्व शिक्षा मन्त्री चित्रलेखा यादवलाई अस्ट्रेलियाका लागि राजदूतको रूपमा सिफारिस गर्ने निर्णय गरेको छ। सोमबार प्रधानमन्त्री निवास बालुवाटारमा बसेको मन्त्रीपरिषद् बैठकले कांग्रेस नेतृ यादवलाई राजदूतको रूपमा सिफारिस गरेको हो।

यसअघि, साउन १४ गते सरकारले १८ देशका लागि राजदूत सिफारिस गरेको थियो। तर, उक्त सिफारिस समावेशी नभएको भन्दै आलोचना भएको थियो। यस विषयमा संसदको अन्तर्राष्ट्रिय सम्बन्ध तथा पर्यटन समितिले भदौ १८ गते सरकारको ध्यानाकर्षण गराउँदै यसलाई सच्याउन अनुरोध गरेको थियो।

समावेशी सिफारिसको अभावका कारण आलोचनामा परेपछि परराष्ट्रमन्त्री डा. आरजु राणा देउवाले माफीसमेत मागेकी थिइन्। यादवको सिफारिसले अब समावेशीकरणको विषयलाई केही सम्बोधन गरेको देखिएको छ।

यादवलाई राजदूतमा सिफारिस गरिनुको पछाडि उनको लामो राजनीतिक अनुभव र अन्तर्राष्ट्रिय सम्बन्धमा योगदान रहेको बताइन्छ। अब यो सिफारिस राष्ट्रपति कार्यालयमा अनुमोदनको लागि पठाइनेछ।