काठमाडौं — अनमोल केसी स्टार रहेको नेपालि सिनेमा  जेरी अन टपले प्रदर्शनको नवौँ दिनमै बक्सअफिसमा धमाकेदार सफलता हासिल गरेको छ । असोज ३१ गतेदेखि प्रदर्शनमा आएको यो फिल्मले हिजो शनिबार मात्र १ करोड १ लाख ३२ हजार ८ सय १३ रुपैयाँ ३३ पैसा ग्रस कलेक्सन गरेको पुष्टि भएको छ।

सुरुवाती दिनदेखि नै आक्रामक व्यापार गरिरहेको ‘जेरी अन टप’ले नेपाली बक्सअफिसमा नयाँ रेकर्डतर्फ अघि बढिरहेको छ। आइतबार पनि देशभरका थुप्रै शो हाउसफूल रहेका छन्, जसले यसको लोकप्रियता अझ बलियो बनाएको छ।

सिनेमामा अनमोल केसी, आँचल शर्मा र जसीता गुरुङबीचको त्रिकोणात्मक प्रेमकथाले दर्शकलाई आकर्षित गरेको छ। तिनै कलाकारबीचको केमेस्ट्री, साथै फिल्मको हिमाली दृश्य, उत्कृष्ट निर्देशन, आकर्षक छायांकन, प्रभावशाली व्याकग्राउन्ड स्कोर र सशक्त सम्पादनले पनि तारिफ पाइरहेको छ।

फिल्ममा लामो समयपछि पर्दामा फर्किएका भुवन केसीको उपस्थिति, साथै केदार घिमिरे, उषा खड्गी र सुरक्षा पन्तका भूमिकाले पनि दर्शकको मन जितेका छन्।

फिल्मी पण्डितहरुका अनुसार ‘जेरी अन टप’ को निरन्तर व्यापारले नेपाली फिल्म बजारमा सकारात्मक संकेत दिएको छ र यो वर्षको सबैभन्दा सफल फिल्ममध्ये एक बन्ने सम्भावना बलियो बनेको छ।