काठमाडौं — चर्चित गायिका एलिना फेरि विवाद र चर्चाको केन्द्रमा आएकी छिन्। उनी भर्खरै अमेरिकामा आयोजित एक सांगीतिक कार्यक्रममा सहभागी हुन गएकी थिइन्, तर कार्यक्रम सकेर फर्किएपछि उनले आयोजकप्रतिको असन्तुष्टि सार्वजनिक गरेकी छिन्।

एलिनाले सामाजिक सञ्जालमार्फत एक लामो टिप्पणी गर्दै लेखेकी छिन् —

“जस्तो छ, त्यस्तै भन्छु — यो टुर मेरो लागि ठूलो सिकाइ बन्यो। कलाकारलाई सम्मान होइन, नोकरझैँ व्यवहार गरियो। कसैले कैदीझैँ महसुस गर्‍यो, कसैले अपमान सहनु पर्‍यो।
एउटा कुरा स्पष्ट भन्न चाहन्छु आयोजक भनेको कलाकारको संरक्षक हो, मालिक होइन। कलाकारले धनभन्दा बढी इज्जत, व्यवहार र कदर खोज्छ। नराम्रा अनुभवले धेरै कुरा सिकायो — अब कुनै कलाकारले यस्तो अपमान भोग्न नपरोस् ”

उनको यो अभिव्यक्तिले सामाजिक सञ्जालमा निकै प्रतिक्रिया पाइरहेको छ। प्रशंसकहरूले उनलाई हिम्मतका साथ बोलेको भन्दै साथ दिएका छन् भने केहीले आयोजकको व्यवहारबारे छानबिन हुनुपर्ने माग पनि गरेका छन्।

एलिना नेपाली संगीत क्षेत्रकी ती कलाकारमध्ये एक हुन्, जसका गीतहरू प्रायः ट्रेन्डिङमा रहने गर्छन्। उनी कहिले आफ्ना गीतका कारण, त कहिले व्यक्तिगत जीवन र विवादका कारण सधैं चर्चा केन्द्रमा रहन्छिन्।

संगीतप्रेमीहरूले भने एलिनाको पछिल्लो अभिव्यक्तिलाई “कलाकारको आवाज” भन्दै समर्थन जनाएका छन्।अमेरिकी टुर एलिनाका लागि ‘सिकाइको यात्रा’ बनेको छ। उनले भोगेको अनुभवले मनोरञ्जन क्षेत्रभित्र कलाकारप्रतिको व्यवहार र सम्मानको विषयमा नयाँ बहस सुरु गरेको छ।